CYNLLUNIO

Arweiniad pellach i’r strategaeth:

Os yw dysgwyr yn trafod mewn grwpiau, gall fod yn fuddiol rhoi rôl iddynt. Mae hyn yn arbennig o wir os yw dysgwyr yn cael trafferth trafod yn effeithiol. Drwy ddynodi rolau mewn grŵp, mae hyn yn rhoi mwy o strwythur ac yn rhoi ymdeimlad cryfach o bwrpas i ddysgwyr – weithiau mae angen hyn os yw dysgwyr yn ei chael hi’n anodd rhoi hyn i’w hunain. 

Bydd gan bob dysgwr ym mhob grŵp rôl benodol y mae disgwyl iddynt ei chwarae, yn rhan o’u rôl ehangach yn y drafodaeth. Mae hyn yn rhoi rhywbeth i’r dysgwyr ganolbwyntio arno a rhoi ymdeimlad cliriach iddynt o’r hyn sydd angen iddynt ei wneud i lwyddo.

Dyma rai enghreifftiau o rolau posib: holwr/ chwilotwr, heriwr, datblygwr syniadau, symbylwr a chadeirydd, crynhöwr, cwestiynwr, ysgrifennydd, amserydd.

Dylid sicrau fod pob disgybl yn deall y rolau a’u cyfrifoldebau o fewn y rôl cyn cychwyn ar y dasg. Gellir paratoi cardiau gyda meini prawf y rôl arnyn nhw o flaen llaw neu fel dosbarth.

Arweiniad ychwanegol ar gyfer 3-8 oed

Llwybrau Datblygu – cyflawni arferion cyfarwydd ac ymgymryd â rolau wrth chwarae.

Gyda ‘Lego Kit’ (wedi’i ddylunio gan ddysgwyr 8-11 ar gyfer 3 i 8 oed), bydd grŵp o dri yn mynd ati i adeiladu gyda’r Lego a dilyn cyfarwyddiadau un unol â’u rolau.  Bydd gan bob dysgwr rôl benodol e.e:

Peirianydd:

• Dweud wrth y cyflenwr pa ddarnau sydd angen
• Dweud wrth yr adeiladwr sut i roi’r darnau at ei gilydd

Cyflenwr:

• Trefnu’r darnau
• Gwrando ar gyfarwyddiadau gan y peirianydd
• Pasio’r brics i’r adeiladwr

Adeiladwr:

• Derbyn darnau gan y cyflenwr
• Gwrando ar gyfarwyddiadau gan y peirianydd
• Rhoi’r darnau at ei gilydd