CYNLLUNIO

Arweiniad pellach i’r strategaeth:

Mae dull y bowlen bysgod yn ddull lle mae pob disgybl yn cael y cyfle i gymryd rhan weithredol mewn trafodaeth. Mae’r dull yn cymryd ei enw o drefn gyffredinol y drafodaeth, gan fod nifer fach o gadeiriau wedi’u gosod mewn cylch mewnol (oddeutu tair i bump) a nifer mwy yn cael eu gosod fel cylch allanol mwy. 

Nod cyffredinol y dull yw i ddisgyblion ddatblygu’r sgiliau o fod yn gyfranwyr ac yn wrandawyr o fewn trafodaeth, gan alluogi disgyblion i ofyn cwestiynau, cyflwyno eu barn a’u meddyliau eu hunain, gwrando ar eraill a rhannu gwybodaeth gan ddefnyddio’r dull hwn (Yabarmase , 2013). 

Wrth weithio yn y ffordd yma, rôl yr athro yw rheoli llif y drafodaeth a sicrhau fod pawb wedi cael cyfle i siarad, e.e. ymyrryd os yw disgyblion wedi siarad yn rhy hir, gwahodd eraill o fewn y cylch mewnol i siarad, a darparu gwerthusiad o’r trafodaethau sy’n cael eu cynnal.

Nodi pwnc posibl i’w drafod (os gellir ystyried pwnc dadleuol, mae’n debygol y byddai hyn yn cynyddu lefel ymgysylltiad y disgyblion) 

• Gofyn i’r disgyblion siarad am eu barn ar y mater, gyda phartner, a chofnodi eu barn yn ysgrifenedig.
• Dangos sut mae dull powlen bysgod yn gweithio i’r disgyblion a’r disgwyliadau sy’n codi o’i ddefnyddio.
• Dechrau’r drafodaeth trwy ddewis disgyblion i eistedd yn y cylch mewnol a thrafod y syniadau a’r safbwyntiau a gododd yn ystod eu trafodaethau cynharach gyda phartneriaid.
• Gofyn i’r disgyblion yn y cylch allanol wrando ar drafodaeth y cylch mewnol ac ysgrifennu unrhyw bwyntiau o ddiddordeb sy’n ymddangos neu unrhyw gwestiynau y gallent fod eisiau eu gofyn ar ôl i’r drafodaeth ddod i ben.
• Gofyn i’r cylch mewnol drafod y pwnc am tua phum munud, heb ymyrryd dim oni bai fod y drafodaeth yn dirywio neu i sicrhau bod pawb yn cael cyfle i gyfrannu at y drafodaeth
• Pan fydd y cylch mewnol yn gorffen eu trafodaeth, gofyn i’r disgyblion yn y cylch allanol fynegi barn am eu trafodaeth a gofyn cwestiynau. Mae hwn yn amser priodol i fodelu cwestiynau a sylwadau da i’r disgyblion.
• Dewis set arall o ddisgyblion i eistedd yn y cylch mewnol ac ailadrodd y broses nes bod pob disgybl wedi cael cyfle i fod yn rhan o drafodaeth y cylch mewnol.