CYNLLUNIO

Arweiniad pellach i’r strategaeth:

Dyma drafodaeth di-eiriau, dosbarth-cyfan. Gellir ychwanegu elfen lafar ar ddiwedd y weithgaredd os ydy’r athro’n dymuno.

Mae angen i’r athro baratoi 4 neu 5 darn mawr o bapur o flaen llaw (yn ddibynnol ar nifer y disgyblion sydd yn y dosbarth) Ar ganol pob darn o bapur, dylid rhoi cwestiwn neu ddatganiad sy’n berthnasol i’r thema neu’r pwnc dan sylw.

Dylid gosod rheolau’r dasg ar gychwyn y weithgaredd. Y rheolau ydy;

• Dim siarad
• Ysgrifennu eu cyfraniadau ar y papurau
• Bydd disgyblion sydd yn cael eu dal yn siarad yn cael eu tynnu allan o’r weithgaredd am 30 eiliad.

Bydd y papurau wedi eu gosod o amgylch yr ystafell ac mae angen i’r disgyblion fynd o amgylch y dosbarth yn ymateb i’r gosodiadau yn ysgrifenedig ar y papurau mawr. Unwaith bydd y disgyblion wedi cael cyfle i ymateb i bob safbwynt, mae angen mynd o amgylch yr ystafell am yr eildro yn darllen ymatebion eraill. Wrth ddarllen y sylwadau, mae angen ymateb iddyn nhw. Y ffordd i wneud hyn ydy cylchu yr ymateb, tynnu llinell oddi wrtho, ac ymateb ar ddiwedd y llinell. Rhaid cylchu eu hymateb hefyd. Ar y diwedd, bydd y papur yn llawn o safbwyntiau wedi cael eu cyfnewid.

Gellir ymestyn y dasg ar y diwedd i gynnwys ymatebion llafar i’r pwyntiau drafodwyd.