CYNLLUNIO

Arweiniad pellach i’r strategaeth:

Bydd y dysgwyr yn derbyn poster neu gartŵn sy’n cynnwys cysyniadau iddynt ymateb iddynt. Gall y cysyniadau neu’r farn ar y poster neu’r cartŵn fod yn rhai cywir neu anghywir. Sbardun yw’r poster neu’r cartŵn i annog trafodaeth.

Mae posib defnyddio’r Cartŵn Cysyniad ar ddechrau neu ar ddiwedd uned o waith ac mae’n ffordd effeithiol o gymhwyso gwybodaeth flaenorol, datblygu dealltwriaeth ac annog cyfraniad gan bawb. Drwy gynnig barn neu syniad i’r dysgwyr, gall hyn annog dysgwyr anfoddog neu dawel i gyfrannu at y drafodaeth ond gellir datblygu’r ymateb gan ofyn i’r disgyblion ymhelaethu a chynnig rhesymau am eu hatebion.